«Болды да партия...»

«Сайлаудың болғанынан болады»-сы қызық. Мажоритарлық бір мандатты сайлаудан пропорционалды жүйеге ауысқанымыз сол-ақ еді, әлді-әлсіз, мәлім-беймәлім партиялардың өн бойына қан жүгіріп, қал-қадіріне сай тірлікке көшті.

Алдымен кезектен тыс съезін жиған «Руханият» болды, «Парламентте 11 орыннан үміттіміз» дескен де солар. Біздің 200 000 мүшеміз бар дескен «ауылдықтар» ұсынған партиялық тізімде қырық кісі болды: ерекше көзге түскені партияның төрағасы – Ғани Қалиев, өнер қайраткері, әнші Нұрғали Нүсіпжанов пен жазушы Дулат Исабеков. Ал «миллионер» (миллион мүшесі бар) «Нұр-Отан» еліміздің заңнамасы рұқсат беретін 127 үміткер ұсыну құқығын түгелдей пайдаланды.
Ақ райхан гүлін нышан еткен Жалпыұлттық социал демократиялық партиясы 80 адамның тізімін жария етті: Жармахан Тұяқбай бастаған тізімде экс-мәжілісмендер Амалбек Тшан, Болат Әбілов пен Оразалы Сәбден, экс-сенаторлар Уәлихан Қайсар мен Зәуреш Батталовалар бар.

«Ақжол» + «Әділет» = 114
«Бұл әннің бұрынғы әннен өзгерек» екендігін ескеріп, сайлау сынына бір ту астында қатысуға бел буған партиялар да бар. Өткен жексенбіде «Әділет» демократиялық партиясының кезектен тыс және тарихи тұрғыда соңғы V съезі өтті.
– «Бүгін Қазақстанның саяси өмірінде ерекше оқиға»,-деді тарих сахнасына кеткен «Әділеттің» төрағасы Мақсұт Нәрікбаев. – Барлық амбицияларымды жиып қойып, мен бүгін «Ақжол» партиясымен бірігетінімізді мәлімдейміз.
Осыған дейін жеті ай бойы блок ретінде бірге жұмыс жасаған қос партия сайлау заңнамалары блоктардың сайлауға қатысуға рұқсат бермейтіндігіне байланысты алдағы сайысқа «Ақ жол» деген атпен қатыспақ.
Партияны «Әділетті Ақжол» деп атау туралы ұсыныс болғанымен, уақыттың тарлығына байланысты «Ақжол» атауы өзгеріссіз қалған.
ҚР Парламенті Мәжілісіне «Ақ жол» партиясының ұсынылған кандидаттар тізімі жарияланды. 114 адамнан тұратын тізімде Әлихан Байменов, Мақсұт Нәрікбаев, Амангелді Айталы, Мырзагелді Кемел бар.